Қала әкімі

Қымбатты шымкенттіктер және шырайлы қаламыздың қонақтары! Құрметті сайтқа келушілер!

   Сіздермен Шымкент қаласы әкімінің веб-сайтында қауышқаныма қуаныштымын!
   Бүгінгі Шымкент – 620 мыңнан астам халқы бар, республиканың қуатты қаржылық, инновациялық, мәдени орталығы және Қазақстанның тұрақты даму сатысындағы ірі мегополистердің бірі.
   Біз, шымкенттіктердің мақтанатын жағдайымыз бар. Елбасымыз Нұрсұлтан Назарбаев Шымкентті еліміздегі үшінші қала мәртебесіне лайық деп танып, облыс орталығының перспективалық дамуы аясында бірқатар тапсырмалар жүктеген болатын. Міне, 2015 жылы қала халқының санын миллионға жеткізуді межелеп отырмыз, бұл үшін әрбір шымкенттік тұрғындардың өмірі жайлы әрі қауіпсіз болуы тиіс. 
   Шымкент - мемлекетіміздің өндірістік қарқындылығын арттыруда айырықша үлес қосатындықтан  экономикалық даму саласында маңызды рол атқарады. Сонымен қатар, мақта-тоқыма, фармацевтикалық және мұнай өңдеу кластері аясында жоғары технологиялық, бәсекеге қабілетті өнім өндіретін қала ретінде еуразиялық континеттегі  халықаралық транзиттік орталықтың біріне айналуға мүмкіндігі зор.  «Батыс-Еуропа-Батыс-Қытай» халықаралық күре жолының Оңтүстік Қазақстан аумағындағы құрылысы Шымкенттің тиімді бизнес-орталыққа айналуына және кеңейтілген серіктестік қарым-қатынастар орнатуына жол ашады. Сондай-ақ, қаладағы жаңадан құрылған индустриялық аймақта заман талабына сай өнеркәсіп орындары жүзеге асырылуда.
   Ақпараттық технологияның ағымы өміріміздің шындығына айнала бастаған тұста ежелгі бай тарихы бар Шымкенттің қазіргі экономикалық және мәдени өзгерістері туралы білуге  қала әкімінің интернет ресурсы арқылы қол жеткізуге болады. Біз өз сайтымызды ашу арқылы қаланың анық әрі айшықты ақпараттары мен жергілікті биліктің қызметін әлемдік ғаламтор жүйесінде таратуды мақсат еттік. Қала басшысы ретінде мені қуантатын жәйт, сайтқа келушілердің бір легі  қалада іске асып жатқан іс-шараларға барынша назар аударып, пайымды түсініктеме қалдырып жатса, енді бірі қаланың жетістіктеріне қуанып, кемшіліктеріне жаны күйзеледі.
   Жұмыс барысындағы уақыттың тапшылығы Сіздермен барлық уақытта тікелей байланыс орнатуға ырық бермейді. Алайда, веб-сайтттағы виртуалды қабылдау арқылы Шымкенттегі мәселелердің жедел әрі айқын шешілуіне мүмкіндік бар деп үміттенемін. 
   Құрметті сайт қонақтары! Біз әрдайым сіздердің ой-пікірлеріңіз бен  ұсыныстарыңызды қабылдауға әзірміз. Біз үшін қай мәселедегі болсын әрбір үн қатулар мен ұсыныстар аса маңызды.

Арман Жетпісбаев, Шымкент қаласының әкімі. 

 

Биографиялық анықтама